پرسیار // ئایا کافرەکان میرات لە یەکتر وەردەگرن ئەگەر ئایینیان لێک جیاواز بوو ؟
وەلام // جیاوازی ھەیە لەنێوان زانایان سەبارەت بە میرات وەرگرتنی کافرەکان لەیەکتری ئەگەر دینیان جیاواز بوو ، دوو وتە ھەیە :
یەکەم : زۆربەی زانایان دەلێن کافر میرات لەیەکتر وەردەگرن ئەگەر چی دینیشیان جیاواز بێت ، کە ئەمە وتەی شافعی و حەنەفی و وتەیەکە لە وتەکانی ئەحمەد ، بەلگە :
(١) کوفر ھەمووی یەک دینە ، وە ئەو فەرموودەی ھاتووە میرات لەیەکتر وەرناگرن خاوەنی دوو دینی جیاواز مەبەست پێی کوفر و ئیسلامە .
دووەم : ھەندێک زانا دەلێن کافر میرات لە یەکتر وەرناگرن ئەگەر دینیان جیاواز بوو ، کە ئەمە وتەیەکە لە وتەکانی ئیمام ئەحمەد ، وە وتەیەکە لە وتەکانی مالکی ، وتەی ابن قدامە و ابن عثیمینە ، بەلگە :
(١) عبداللە بن عمرو دەلێت : پێغەمبەر سەلامی خوای لێ بێت فەرمووی : (( لا یتوارث أھل ملتین )) رواە احمد والأربعة إلا الترمذي . ، واتە میرات لە یەکتر وەرناگرن خاوەنی دوو ئاینی جیاواز .
کەواتە ھۆکاری جیاوازی نێوان زانایان بۆ ئەوە دەگەڕێتەوە ئایا کوفر چەند دینێکن یان ھەموویان یەک دینن ، لە ئیمام مالک و ئەحمەد و ھەندێک پێشینەکان نقل کراوە کە کوفر سێ دینن : گاور و جوولەکە و دینەکانی تر ، ئەوانەی دەلێن کوفر چەند دینێکن دەلێن میرات لەیەکتر وەرناگرن ، چونکە دینیان جیاوازە ، ئەوانەی دەلێن کوفر یەک دینە دەلێن میرات لە یەکتر وەردەگرن .
وتەی ڕاست وتەی دووەمە کە دوو دینی جیاوازی میرات لە یەکتر وەرناگرن ، بەلگە :
(١) فەرموودەی عبداللە بن عمرو ڕوون و ئاشکرایە .
(٢) ھەموو دینێکی جیاواز لەیەکتری پشتگیری نییە لەنێوانیان ، ئەوانیش میرات لە یەکتر وەرناگرن وەک موسلمان و کافر .
پوختەی وەلامی زانایان :
(١) موسلمان میرات لە کافر وەرناگرێت و کافریش میرات لە موسلمان وەرناگرێت .
(٢) کافر میرات لە کافر وەرناگرێت ئەگەر دینیان جیاواز بوو ، وەک : گاور و جوولەکە میرات لە یەکتر وەرناگرن .
(٣) کافر میرات لە کافر وەردەگرێت ئەگەر یەک دینیان ھەبوو ، کە ھەموو زانایان یەک دەنگن لەسەری .
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ