سەردێری پرسیار: حوکمی ڕەتکردنەوەی داخوازی لەبەر خەونی ناخۆش ؟

بەرواری دانان: 2018-10-12 کۆدی پرسیار: 526

پرسیار:

پرسیار // ئایا دروستە داخوازی ڕەت بکەمەوە لەبەر ئەوەی خەونی ناخۆشم بینیووە ؟

دەقی وەڵام:



وەلام // زۆر لە کچان کاتێک داخوازی بۆیان دێت تووشی دلەڕاوکێ دەبن یان لەبەر زۆری بیرکردنەوە لەم بابەتە دلیان ڕەق دەبێت و تووشی سەرئێشە دەبن یان لەسەر ئەم بیرکردنەوەیە دەخەون خەونی پێوە دەبینن و دوای ڕەتی دەکەنەوە .

دین لەگەڵ ئەوە نییە خەون بکەیتە بەلگە و ژیانی خۆت لەسەر خەون بەڕێوە ببەیت و بڕیار بدەیت ، شەیتان ڕۆلێکی زۆری هەیە لە خەون .

عن أبي هريرة رضي الله عنه أن النبي صلى الله عليه وسلم قال : (( الرُّؤْيَا ثَلاَثَةٌ: فَرُؤْيَا الصَّالِحَةِ بُشْرَى مِنَ اللَّهِ، وَرُؤْيَا تَحْزِينٌ مِنَ الشَّيْطَانِ، وَرُؤْيَا مِمَّا يُحَدِّثُ الْمَرْءُ نَفْسَهُ )) رواە مسلم (۲۲٦۳) .

واتە : خەون سێ جۆرە ، خەونی خۆش مژدەیە لە لای خوای گەورەوە ، وە خەونی خەمباری لە شەیتانەوەیە ، وە خەونیش هەیە مرۆڤ لەسەر بیرکردنەویەک دەخەوێت هەر ئەو دێتە خەونی ، ئەمەیان پشت گوێی دەخەیت و حسابی بۆ ناکەیت .

کەواتە ئەوەی مرۆڤ زۆر لێی وشیار بێت ئەوەیە کە شەیتان ڕۆلێکی زۆری هەیە لە خەون ، وە پێغەمبەر سەلامی خوای لێ بێت زەواجی پەیوەست نەکردووە بە خەون ، نەی گوتووە ئەگەر خەونی خۆشت پێوە بینی شووی پێ بکە ، وە ئەگەر خەوی ناخۆشت پێوە بینی ڕەتی بکەوە .

ابن عثیمین ڕەحمەتی خوای لێ بێت پرسیار لێی کراوە ، پیاوێک داوای ئافرەتێکی کردووە ، ئافرەتەکە لەخەوندا پیاوەکەی بینیووە ڕیشی تاشیووە ، ئایا لەسەر ئەم خەونە بڕۆم یان نە ؟ بەلام پیاوەکە ڕووکەشەکەی باشە و ڕیشی نەتاشیووە ، پیاوێکی پابەندە بە دین ؟

لە وەلام دا دەفەرمووێت : (( ئافرەت خەونی بینیووە داخوازی کاری ڕیشی تاشیووە کەچی لە واقع دا وانییە هیچ زیانی پێ ناگەینێ لەوەی کە بینیویەتی لەخەوا ، نابێت ڕێگری لێ بکرێت لە شوو کردن ئەگەر پیاوەکە پابەند بێت بە دین و خاوەن ڕەوشت بێت .)) لقاء الباب المفتوح .

موسلمان نابێت گەش بین و ڕەش بین بێت بەخەون هەموو ژیانی لەسەر خەون بەڕێوە ببات ، چەند بەدوای خەون بڕۆیت وەک وەسواس خراپتر دەبیت و ژیان تاڵ تر دەبێت ، نالێین هەموو خەونێک درۆیە و وە ناڵێین هەموو شتێکیش خەونە ، بەلکو دەبێت مام ناوەند بیت و سنور نە بەزێندرێت ، بەتایبەتی ئافرەتان زۆریان سنوریان بەزاندووە لە خەون .

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

لیستی بەشەکانی پرسیار و وەڵام