دەقی وەڵام:

وەلام // زانایان دەلێن کەفارەتی سوێند خواردن ئەمانەن :

یەکەم // خواردن دانە بە دە ھەژار ، کە دەکاتە نیو صاع بە نزیکەیی دەکاتە یەک کیلۆ چارەک یان یەک کیلۆ و نیو خواردنی ئەو شارە ، وەک : برنج و شتی تری ھاوشێوەی برنج کە خواردنی ئەوە شارەیە ، وە دەکرێ دە کەس میوان بکەیت یان ژەمی خواردنی تەواوی بۆی ببەیت .

دووەم // جل و بەرگ بۆ دە ھەژار دابین دەکەیت ، زانایان دەلێن دەبێت جل و بەرگێک بێت بۆ نوێژ بگونجێت و عەورەتی مرۆڤ داپۆشێت ، واتە بۆ پیاو قەمیص و پانتۆل یان شەلوار ، وە بۆ ئافرەت جلێک بێت ھەموو لاشەی داپۆشێت و لەچکەشی " سەرپۆشیشی " لەگەڵ بێت .

سێیەم // بەندەیەکی ئیماندار ڕزگار بکات .

زانایان دەڵێن موسلمان بە ئارەزووی خۆیەتی لەم سێیانەی سەرەوە ھەر یەکێکیان بکات دروستە ، ئەگەر ھیچ لەم سێیانەی پێ نەکرا ئەوا سێ ڕۆژ بەڕۆژوو دەبێت لەسەر یەک " واتە بەدوای یەک " ، بەلگە :

خوای گەورە دەفەرمووێت : (( لا يُؤَاخِذُكُمُ اللَّهُ بِاللَّغْوِ فِي أَيْمَانِكُمْ وَلَكِنْ يُؤَاخِذُكُمْ بِمَا عَقَّدْتُمُ الأَيْمَانَ فَكَفَّارَتُهُ إِطْعَامُ عَشَرَةِ مَسَاكِينَ مِنْ أَوْسَطِ مَا تُطْعِمُونَ أَهْلِيكُمْ أَوْ كِسْوَتُهُمْ أَوْ تَحْرِيرُ رَقَبَةٍ فَمَنْ لَمْ يَجِدْ فَصِيَامُ ثَلاثَةِ أَيَّامٍ ذَلِكَ كَفَّارَةُ أَيْمَانِكُمْ إِذَا حَلَفْتُمْ وَاحْفَظُوا أَيْمَانَكُمْ كَذَلِكَ يُبَيِّنُ اللَّهُ لَكُمْ آيَاتِهِ لَعَلَّكُمْ تَشْكُرُونَ )) المائدة / 89 .

زۆربەی زانایان دەلێن نابێت پارە بدەیت بۆ کەفارەتی سوێند .

ابن قدامە ڕەحمەتی خوای لێ بێت دەفەرمووێت : (( نابێت بۆ کەفارەت پارە بدەیت بۆ خواردن دان یان بۆ جل و بەرگ ، چونکە خوای گەورە باسی خواردنی کردووە کەفارەت بۆ بێجگە لە ئەمە ناکرێ ، وە لەبەر ئەوەی خوای گەورە مرۆڤی سەرپشک کردووە لە نێوان ئەم سێ شتانە ئەگەر پارە دروست بوایا ئەوە تەنھا ئەم سێیانەی باس نەدەکرد ، .... )) " المغنی "

ابن عثیمین ڕەحمەتی خوای لێ بێت دەفەرمووێت : (( ئەگەر مرۆڤ نەیتوانی بەندە ڕزگار بکات یان خواردن بدات یان جل و بەرگیان پێ بدات ، ئەوا سێ ڕۆژ بەڕۆژوو دەبێت ، بەلام دەبێت ئەو سێ ڕۆژە بەدوای یەک بگرێت و لە نێوان ئەم سێ ڕۆژە ڕۆژوو نەشکێنێت . )) فتاوى منار الإسلام ( 3/667 )

ـــــــــــــــــــــــــــــــــــــــــــــــــــــــــــــــــــــــــــ