دەقی وەڵام:

وەڵام: زانایان سەبارەت بەمە دەڵێن:

١- پازدە میراتگری پیاو هەن هەموو زانایان یەک دەنگن لەسەری کە میرات وەردەگرن، یەکێک لەوانە: (کوڕی کوڕی بەرەو خوارەوە).

٢- دە میراتگری ئافرەت هەن هەموو زانایان یەک دەنگن لەسەری کە میرات وەردەگرن، یەکێک لەوانە: (کچی کوڕ بەرەو خوارەوە).

٣- کوڕی کوڕ و کچی کوڕ میرات دەبەن بە (تعصیب) ئەگەر مردووەکە کوڕی نەمابێت، کە هەموو زانایان یەک دەنگن لەسەر ئەمە، ئەگەر مردووەکە کچی مابێت، ئەوە کوڕی کوڕ و کچی کوڕ میرات دەبەن.

٤ـ کوڕی کوڕ و کچی کوڕ بێ بەش دەبن لە میرات لەبەر کوڕی مردووەکە، جا کوڕی مردووەکە باوکی مناڵەکان بێت یان مامی بێت دەبێتە ڕێگر لەوەی میرات بۆ کوڕی کوڕ و کچی کوڕ بڕوات.

٥ـ میراتی کوڕی کوڕ و کچی کوڕ بە (تعصیب) دەبێت، واتە: کوڕی کوڕ دوو ئەوەندەی کچی کوڕ دەبات.

نموونە: کەسێک مردووە ئەم میراتگرانەی دوای خۆی جێ هێشتووە: (٤) کچ، (١) کوڕی کوڕی، (١) کچی کوڕ، میراتەکەشی (١٢) دەفتەر دۆلارە، میرات بەم شێوەیە دابەش دەکرێت:

ـ (٤) کچەکە میرات دەبەن بە دیارکراوی (فرض)، لە سێ بەشی میرات دوو بەش دەبەن، واتە: (١٢) دەفتەر بکە بە سێ بەش، کە هەر بەشێکیان دەکاتە (٤) دەفتەر، لەو سێ بەشە دوو بەش بۆ کچەکانی مردووەکەیە، واتە: (٨) دەفتەر بۆ چوار کچەکەیە، هەر کچێکیان (٢) دەفتەری بەر دەکەوێت.

ـ کوڕی کوڕی و کچی کوڕ ئەو میراتەی ماوەتەوە بە (تعصیب) دەبەن، کوڕی کوڕ دوو ئەوەندەی کچی کوڕ دەبات، ئەو بەشەی ماوەتەوە (٤) دەفتەرە کە (٤٠٠) وەرەقەی دۆلار دەکات، کوڕی کوڕ (٢٦٧) وەرەقەی بەر دەکەوێت و کچیش (١٣٣) وەرەقەی بەردەکەوێت.