کەسێک کەمێک ئاوی لەلایە و بێ دەست نوێژە و ھەندێک بە جل و بەرگییەوەیە، ئایا جل و بەرگ خاوێن بکات و تەیمموم بکات، یان دەست نوێژ بگرێت و واز لە جل و بەرگ بھێنێت؟
وەڵام: زانایان دەڵێن ھەر کەسێک بێ دەست نوێژ بێت و جل و بەرگی پیس بێت، لەم حالەتە دەبێت جل و بەرگی پاک بکاتەوە پاشان تەیەمموم بکات ئەگەر ئاو کەم بوو یان بەشی دەست نوێژ گرتن نەکات، کە ئەمە وتەی زۆربەی زانایانە حەنەفی و شافعی و حەنابلە و وتەیەکە لە وتەکانی مالکی و داود الظاهری یە،
(١)تەیەمموم جێگیر بووە بە یەک دەنگی ھەموو زانایان، بەڵام تەیەمموم بۆ پیسایی جیاوازی ھەیە لەنێوان زانایان.
(٢)پیسایی دەبێت خودی پیساییەکە لابدرێت، چونکە ھیچ جێگرەوەی نییە، پێچەوانەی بێ دەست نوێژی تەیەمموم جێگرەوەیەتی.
ابن قدامة ڕەحمەتی خوای لێ بێت دەفەرمووێت: (ئەگەر پیسایی و بێ دەست نوێژی پێکەوە کۆبوونەوە، وە ئەوەندە ئاوی لەلایە بەشی یەکێکیان دەکات، لەم حالەتە دەبێت پیساییەکە لابدات و بشوات پاشان تەیەمموم دەکات، ئیمام ئەحمەد دەقی ھەیە لەسەر ئەمە، خلال دەفەرمووێت: باوکی عبداللە و سوفیان یەک دەنگن لەسەر ئەمە، نەمان زانیووە جیاوازی ھەبێت لەنێوان زانایان.) المغنی (٢٠١/١).