دەقی وەڵام:

وەلام // زانایان دەلێن دەبێت سوجدەی سەھو بۆ گومان ببەیت ، تووشی گومان بوون ئەم دوو حالەتەیە :

حالەتی یەکەم / ئەگەر دوای تەواو کردنی نوێژ تووشی گومان بوویت ، لەم حالەتە گوێ نادەیتە گومان و سوجدەی سەھو نابەیت ئیلا ئەگەر دڵنیا بیت .

نموونە : نوێژت تەواو کرد ، دوای تەواو بوون لە نوێژ گومانت بۆ دروست لەوەی کە تەحیاتت خوێندووە یان نە ، لەم حالەتە گوێ نادەیتە ئەم گومانە و سوجدەی سەھو نابات ئیلا ئەگەر دلنیا بێت کە تەحیاتی یەکەمی نەخوێندووە .

حالەتی دووەم / ئەگەر لەناو نوێژ تووشی گومان بوویت ئەم دوو حالەتەیە :

(١) تووشی گومان بوویت لەناو نوێژ بەلام گومانت بە زۆری بە لایەکدا دەڕوات ، لەم حالەتە کار بە گومانە زۆرەکە دەکەیت و دوو سوجدەی سەھو دوای سەلام دانەوە دەبەیت ، بەلگە :

پێغەمبەر سەلامی خوای لێ بێت دەفەرمووێت : (( ..... وَإِذَا شَكَّ أَحَدُكُمْ فِي صَلاتِهِ فَلْيَتَحَرَّ الصَّوَابَ فَلْيُتِمَّ عَلَيْهِ ثُمَّ لِيُسَلِّمْ ثُمَّ يَسْجُدُ سَجْدَتَيْنِ )) رواه البخاري ، واتە : ئەگەر یەکێک لە ئێوە تووشی گومان بوو لەناو نوێژ با لە صواب بگەڕێت و گومانی زیاتر بۆ چ دەڕوات با لەسەری بڕوات و نوێژی تەواو بکات ، پاشان با سەلام بداتەوە پاشان با دوو سوجدەی سەھوو ببات .

نموونە : دەستت بە نوێژ کرد لەناو نوێژ تووشی گومان بوویت لەوەی کە لە ڕەکاعەتی سێیەمی یان چوارەمی ، بەلام بەزۆری گومانت بۆ لایەک دەڕوات واتە بەزۆری گومانت بۆ ڕەکاعەتی چوارەم دەڕوات ، لەم حالەتە ڕەکاعەتی چوارەم حساب دەکەیت و پاشان دوو سوجدەی سەھو دەبەیت دوای سەلام دانەوە .

(٢) تووشی گومان بوویت لەناو نوێژدا وە گومانت بە ھیچ لایێکدا ناڕوات ، لەم حالەتە کەمتری ھەلدەبژێری و پاشان دوو سوجدەی سەھو دەبەیت پێش سەلام دانەوە ، بەلگە :

عن أَبی سَعِيدٍ الْخُدْرِي رضي الله عنه قَالَ : قَالَ رَسُولُ اللَّهِ صَلَّى اللَّه عَلَيْهِ وَسَلَّمَ : " إِذَا شَكَّ أَحَدُكُمْ فِي صَلاتِهِ فَلَمْ يَدْرِ كَمْ صَلَّى ثَلاثًا أَمْ أَرْبَعًا فَلْيَطْرَحِ الشَّكَّ وَلْيَبْنِ عَلَى مَا اسْتَيْقَنَ ثُمَّ يَسْجُدُ سَجْدَتَيْنِ قَبْلَ أَنْ يُسَلِّمَ فَإِنْ كَانَ صَلَّى خَمْسًا شَفَعْنَ لَهُ صَلاتَهُ وَإِنْ كَانَ صَلَّى إِتْمَامًا لأَرْبَعٍ كَانَتَا تَرْغِيمًا لِلشَّيْطَانِ " . رواه مسلم

واتە : ئەگەر یەکێک لە ئێوە تووشی گومان بوو لەناو نوێژ نازانێت چەند ڕەکاعەتی کردووە سێ ڕەکاعەتی کردووە یان چوار ڕەکاعەتی کردووە ، با گومانەکەی فڕێ بدات و وە نوێژ بنیات بنێت لەسەر ئەوە کە دڵنیایە ئەویش ھەلبژاردنی کەمترینەکەیە ، پاشان دوو سوجدەی سەھو دەبات پێش سەلام دانەوە .......

نموونە : دەستت بە نوێژ کرد لەناو نوێژ تووشی گومان بوویت نازانیت لە ڕەکاعەتی سێیەمی یان لە ڕەکاعەتی چوارەم ، لەم حالەتە کەمترین ھەلدەبژێری کە ڕەکاعەتی سێیەمە ، وە نوێژ تەواو دەکەیت و دوو سوجدەی دەبەیت پێش سەلام دانەوە .

ـــــــــــــــــــــــــــــــــــــــــــــــــــــــــــــــــــــــــ